"Munyak pancitraan tarus, duit ngalih banar kaluar, ganggam banar, liwar."
Itulah kalimat nang muncul untuk mengawali tulisan ini.
Inya kada nang ngaran pancitraan tu pang nang jadi masalah.
Pancitraan tu sah-sah aja, kada masalah.
Pancitraan tu kiasnya sama halnya misal ada kaluarga atau mintuha atau kawan maundang hajatan atau basalamatan atau mangiau bahauran di rumahnya, tapi kita asa koler datang atau tapaksa jua datang.
"Biar"ae datang asal datang ha, biar kada makan atau bagawian nang panting datang. Biar barat hati umpamanya datang, nang panting datang. Biar tapaksa bamanis muha, biar dipadahkan urang umpamanya handak minta tangguh; kalihatan baik, kada apa-apa. Inya nang penting tu ujar Guru, niat mahimungi hati urang, di situ nang dapat pahalanya. Tatuhaanya sama jua bapadah kaya itu."
Nang kisah datang tapaksa atau semisal lawan kalakukan nang kaya itu, itu sama pancitraan. (Pancitraan nang dipakai gasan meraih kakuasaan lain lagi kisahnya, anu"ae).
Intinya, biar pancitraan; handak minta tangguhkah, atau misalnya babari duit kisah pamurah, itu kada apa-apa, nang panting pamurahnya itu nang iyanya syarat dapat pertolongan, perlindungan Allah Subhanahu Wa Taala, syarat sugih tapi pamurah, disambuhakan dari bamacam-macam panyakit, ujar Guru-guru.
Mengutip kalam Guru, jar sidin,"Urang pamurah itu kekasih Allah walau urangnya jahil atau bodoh, urang pelit alias ganggaman atau bakhil alias engken alias pamalar itu musuh Allah Subhanahu Wa Taala biar urangnya alim."
Mun bamusuh Allah, kawalah manang kira-kira?
Jadi, nang hibat tu amalan pamurahnya tu pang dah sakalinyalah?!
"Mudah-mudahan kita ditolongi Allah Subhanahu Wa Taala kawa sugih tapi pamurah. Aamiin."
(Iwan Hardi, S.Pd.I)
0 Komentar